台語譯文：
李鳴鵰（1922-2013），出世佇新竹州大溪郡 （這馬的桃園縣大溪區），食老蹛臺北。公學校畢業了後，𪜶阿叔廖良福佮朋友洪汝修共伊照顧，前後捌佇「大溪寫場」和「富士寫真館」做散工學功夫，學習玻璃底片的技術，並且靠這項手路佇臺北做翕相館的生理場出頭。為著達成升學的心願，進入廣東嶺南美術學塾學畫圖，1941年太平洋戰爭爆發，因為有日本籍著愛入伍參軍。二戰結束轉來臺灣，創立中美行照相材料部(後來改做中美照相器材行)，仝時陣無停跤紲落經營攝影（liap-iánn）事業，創辦《臺灣影藝月刊》。
這个作品是烏白的，照實反映出臺灣早期經濟農業（lông-gia̍p）的景象，攝影家對人物的背影落手去翕踏水車。四箍圍是水田，水田外圍草仔發甲真旺。兩个作田人（tsoh-tshân-lâng）為著閘日，頭戴瓜笠仔（kue-le̍h-á），身軀穿較方便作穡（tsoh-sit）的短褲佮紗仔衫（se-á-sann），拚力踏水車（ta̍h-tsuí-tshia）共紡予行，二个人相互合作破水淹田。李鳴鵰長期關心臺灣社會的平民文化（pîng-bîn　bûn-huà），為臺灣光復初期留下真濟樸實佮寶貴的影像。這个作品正爿下仔有寫作品的資訊「踏水車 2/15 李鳴鵰1947」這幾字。
出處：柯惇敏，國立臺灣美術館典藏詮釋資料，2021。
出處：王雅玲，國立臺灣美術館典藏詮釋資料，2025。