台語譯文：
夏一夫（1927－2016），字玉符，出世佇山東省棲霞市。對煙台師範學校出業，1949年綴軍隊來臺灣，做廣告、家具設計佮蠟染（la̍h-ní）畫圖創作的頭路，閣來綴傅狷夫學水墨畫，捌得著臺北巿立美術館「水墨創新」頭獎的肯定。伊的水墨創作較濟是以山水的題材為主，用枯筆焦墨（koo-pit ta-ba̍k）、幼筆皴拭重疊（tshun-tshit　tîng-tha̍h）的功夫，結合西方透視的概念，營造出個人獨一無二的風格。
這幅畫作〈菊與雞〉是夏一夫創作的水墨小品，內容雖然簡單，毋過真心適，對畫面正爿下底斜斜伸去面頂的彼蕊菊花（kiok-hue），佮雞仔囝（ke-á-kiánn）的位置成做咱構圖所講的對角線，嘛加添動態的視覺感受，菊花和草仔的畫法攏是「畫形添彩」，用筆足紲拍，線條誠性格，啊若葉仔的部份是用寫意的「沒骨畫法」（bu̍t-kut uē-huat）來表現，用筆𪐞色的時有十分的把握，袂一定愛畫甲足仝形，重墨佮淡墨相濫，等甲焦去了後才閣用重墨快速畫出葉骨的形，重（tiōng）「用筆」的花卉（hue-huì）佮重「用墨」的葉仔，佇畫面成做真趣味的對比。畫雞仔囝嘛以「寫意」的手法，墨色輕重處理甲真拄好，紲落用幼筆來畫細節，輕鬆自在，簡單畫幾下仔，煞會當畫甲活跳跳，三隻雞仔囝一隻深兩隻淺，𪜶那探那看的彼款形實在誠趣味。規幅圖功夫在穩，「工」佮「寫」正港有扭掠，表現雞仔囝的姿勢佮神韻，活潑迷人，全然表現出天真妥直（thò-ti̍t）的情景。
王雅玲，國立臺灣美術館典藏詮釋資料，2025。