台語譯文：
江漢東，1926年出世佇福建，1948年來臺灣了後讀臺北師範學校藝術科，畢業了捌去李仲生開佇安東街的畫室研究現代繪畫，想欲對東方傳統文化內底吸收養份轉化做伊家己的現代畫圖語言。1959年參秦松、楊英風、陳庭詩、李錫奇等等共同創辦「現代版畫會」，積極發展版畫（pán-uē）的媒材佮技法，予版畫藝術成做閣較有表現性的藝術形式。江漢東真佮意早期立體派（li̍p-thé-phài）的結構語法，而且伊嘛長期咧注意民間藝術佮原始藝術，發展出足淳樸原始（sûn-phoh　guân-sí）的風格。1968年致著青光眼了後差不多攏看無矣，捌舉辦「最後畫展」，就算現實遮爾艱難，藝術家猶是創造出新的畫圖風格。伊的作品有參加過巴西聖保羅國際雙年展、得著美國新聞處主辦的中國青年畫家榮譽獎、全國畫學會版畫類金爵獎，第七屆李仲生基金會現代繪畫獎創作獎。年老的時也捌舉辦真濟改大型的回顧展。
從1955年佇李仲生畫室學習開始，江漢東直直拍拚，欲對中國傳統民俗藝術（bîn-sio̍k-gē-su̍t）佮歐美前衛藝術之間去揣出新的表現空間，並且積極咧實驗一款用線條做主要元素的畫圖語言。〈跑馬燈〉是江漢東的視力恢復了後、拚勢開展伊創作可能性的一件作品。〈跑馬燈〉記錄藝術家佇故鄉所看著的元宵（Guân-siau）慶典，一陣人騎馬頭咧走、咧跳、也行也歇、鬧熱滾滾的走馬燈（tsáu-bé-ting）。目睭無看見以後，藝術家專門佮意這款對記持內底跳出來、若眠夢的光景，和一種規逝規囷、相連紲、佇畫面內底一直轉踅的構圖形式。
出處：黃靜瑩，國立臺灣美術館典藏詮釋資料，2020。
出處：王雅玲，國立臺灣美術館典藏詮釋資料，2025。