台語譯文：
鄧南光（1908-1971），佇新竹縣北埔鄉（日本時代舊名是新竹州竹東郡北埔庄）出世，是臺灣攝影史內底重要的攝影家之一，捌參張才、李鳴鵰做伙予人稱做「三劍客」。1924年去日本留學，1929年入去日本的法政大學，閣參加學校的寫真部（社團），買一台萊卡相機了後，對家己佮意的攝影是蹽甲愈深。轉來臺灣以後開一間店咧賣攝影器材，店名號做「南光寫真機店」，毋但做生理，也有咧舉辦攝影活動來佮仝款愛翕相的朋友互相交流、牽教後輩，而且真骨力咧創作。長期記錄新竹北埔常民的生活，留真濟寶貴的影像記錄落來。
畫面內底，溪邊遮的婦人人佇溪仔墘（khe/khue-á-kînn）當咧拍拚洗衫仔褲（sé/sué sann-á-khòo），逐个都面對溪岸咧洗，排甲整整齊齊。這个慣勢往過是南部美濃較有看見，主要是欲保護家己袂無張持受著攻擊，面向溪岸會當防止隨時發生的危機。咱無法度確定遮的婦女（hū-lú/lí）敢就是照這款例，不而過規个畫面咱看會著岸邊平坦的紅毛塗（âng-mn̂g-thôo）構造，成做婦女𪜶洗衫上蓋理想的選擇。鄧南光的鏡頭記錄彼當陣普通時的生活風景，也成做臺灣早期的人文影像（lîn-bûn-iánn-siōng）記錄。
出處：王雅玲，國立臺灣美術館典藏詮釋資料，2025。