台語譯文：
這幅水墨（tsuí-ba̍k）素描題材真特殊，圖內底上蓋有力、上唌人目的，應當就是中景彼四枝掛根掛葉橫囥佇遐的甘蔗（kam-tsià），頭前是畫四隻雙跤予人縛咧蝹佇塗跤（桌頂）的兩對雞仔（ke/kue-á）；後壁有𫞼兩跤四層的𣛮籃（siānn-nâ）。正爿下仔用行草書寫「嫁娶的伴手 草如」無頓印仔。可見，是伊去共人鬧熱食喜酒（tsia̍h-hí-tsiú），看著桌仔頂的伴手禮（phuānn-tshiú-lé），一時心適興紲手用毛筆速寫落來的。這幅畫筆路恬實閣流通，雖然用筆簡練，毋過造形誠斟酌而且無一筆是凊彩畫的，足生活化咧記錄臺灣早期傳統民間婚禮嫁娶定看著的伴手禮。
圖內底甘蔗、雞佮𣛮籃的層次，攏是用四(雙數的倍數)這个數目，而且有「雙雙對對，萬年富貴」、「事事如意」的意思；雞的台語發音佮「家」仝款，有隨欲起的意思；甘蔗味甜，是代表翁仔某感情甜蜜。這幅圖甘蔗畫甲上好。因為蔗糖是自明清時期以來，其中一項臺灣上主要外銷的產品，逐位都看會著甘蔗園，嘛是臺灣特殊的農村景緻，毋過從到今（tsîng-kàu-tann）煞毋捌看著有出現甘蔗畫法的畫譜，古畫內底嘛真罕得看著。近代畫家林玉山畫的甘蔗上蓋出名，定定向林玉山請教的蔡草如，佇這幅水墨速寫內面，也展現出伊真𠢕畫甘蔗的造型，嘛共甘蔗的特色描畫甲仁仁仁，看會出伊的功力有影真深。
王雅玲，國立臺灣美術館典藏詮釋資料，2025。