台語譯文：
對前輩攝影家嘛是電信界頭人周志剛先生的口述歷史訪談內底，咱知影臺灣第一座「電亭」是徛佇西門圓環，日本時代留落來的一座碉堡改建的，到50年代了後，因為電信業愈來愈發展，引進美國橐錢（lok-tsînn）款的，改名做《公用電話（kong-iōng tiān-uē）》，大大利便彼當陣的民眾。
這張真明顯是佇臺北火車頭（Tâi-pak Hué-tshia-thâu）出口翕的場景，鄧南光採用直式的構圖，展現公用電話亭規个包起來、有隱私、𫞼騰騰（tshāi-thîng-thîng）剛強的特性，佮邊仔彼位查某人雙手攬資料袋仔、穿插時行，尤其是彼領抾襇（khioh-kíng）的裙配搭白衫（pe̍h-sann），表現出時代女性（sî-tāi lú/lí-sìng）按怎迷人，形成一款強烈的對照；後壁騎鐵馬對邊仔過的人、佮排隊等欲敲電話的氣氛，閣較加強時代直直咧進步的氣象。
這張是文建會時期就已經典藏的一系列作品的一張，因為登錄的資訊無濟，閣比較伊所有已經數位化的底片檔案了後，嘛無發現這張底片有留存，表示這批早期典藏真稀罕的鄧南光原作，對研究鄧南光這世人創作美學的觀念，是不止重要的參考根據之一。
賴欣宜，國立臺灣美術館典藏詮釋資料，2025。