台語譯文：
這幅柴刻版畫用三段式的構圖呈現，下底是一个查某人（tsa-bóo-lâng）手裡提鏡（kiànn），邊仔的查埔人（tsa-poo-lâng）咧共伊梳頭（se-thâu）。中節有兩隻徛倒反向的雞公（ke/kue-kang），上頂面是徛佇樹仔（tshiū-á）兩爿的老爸、抱嬰仔（enn/inn-á）的老母。樸實的線條予作品充滿純真的性命力，分段式的構圖有敘事性（sū-sū-sìng），親像講予看的人聽彼條伊數念的囡仔時的長汀囡仔歌（gín-á-kua） 。規幅圖無留一屑仔空間，規个用線條佮花點（hue-tiám）楔（seh）甲滇滇，密喌喌（ba̍t-tsiuh-tsiuh）的構圖，共畫面妝甲花漉漉，袂輸素人藝術（sòo-jîn gē-su̍t）彼款多彩奢華的圖像佮色彩，真有囡仔款的趣味。作品先用主版印烏色的浮線起去，才閣親手用點染（tiám-ní）的方式做色，用足濟線條佇畫面內底穿引流動。畫面的動勢予人感覺直透伸對頂面起去，曲線無接逝（tsiap-tsuā），予畫面真流通閣有節奏，規个作品充滿活力。江漢東用家己的方式，筆攑咧全然照心意，袂予世間萬物現實的形體束縛，是伊創作的信念。個人風格顯明的柴刻版畫受著立體主義影響，畫面變做較平面款（pênn/pînn-bīn-khuán），追求表現二度空間，佇臺灣柴刻版畫（tshâ-khik pán-uē）的創作領域建立一種和人無相仝的風格。
出處：賴欣宜，國立臺灣美術館典藏詮釋資料，2025。