台語譯文：
高燦卿（1910-1936）佇南投出世，捌參與日本時代埔里的地方學生運動組織，並且兩擺入選官方舉辦的臺灣美術展覽比賽，這件〈持洋傘的女子〉就是其中一件，入選1931年第五回的臺灣美術展覽會。畫內面是一位表情嚴肅、手攑洋傘（iûnn-suànn），坐藤椅坐正正的查某人，椅仔邊的几桌頂面有囥水罐（tsuí-kuàn）佮杯仔，背景是青lìng-lìng真茂的樹欉，構圖袂輸激姿勢咧翕相仝款。查某人穿一軀中式旗袍，藍綠色的花逝，高燦卿落筆的筆觸是真重閣自由，手對䘼口（ńg-kháu）伸出來囥佇大腿頂面，畫家無用寫實的方式來畫人的肉色，顛倒用真強烈飽滇、差不多是原色的柑帶紅，共查某人的皮膚抹厚做色，嘛佮伊結佇耳仔邊的大紅花相叫應，予看的人真強烈的視覺衝擊，蓋有野獸派（iá-siù-phài）（Fauvism）的風格特色。查某人手裡攑的洋傘，架（khuè）佇肩胛頭的方式無啥符合透視法，暗挲挲的洋傘布下底，畫家刁工共傘骨的立體結構斟酌畫甲清清楚楚。背景旺盛的葉欉（hio̍h-tsâng）用黃、藍、青色一重一重疊起去，查某人的打扮佮藤椅遮的元素，真有東方的風情，畫出東方、南國（lâm-kok）意象相插濫（sio tshap-lām）的地方色彩。
賴欣宜，國立臺灣美術館典藏詮釋資料，2025。