台語譯文：
曾得標畫膠彩已經有五十外冬久，綴林之助學畫圖，受著先生的啟發，以中國古早用膠來漆色的傳統手路，可比講唐朝的金碧山水、宋朝的院體畫這寡風格，結合現代的藝術思路，表現出東方人的精神佮時代的特性，憑這款安定雅氣的畫面，來顯示人佮大自然和諧的關係。毋但家己創作，嘛拍拚推捒(tshui-sak)膠彩畫，參與組織臺灣膠彩畫協會，予膠彩畫（ka-tshái-uē）佇臺灣通穩定發展落去。
〈窯〉是畫瓷窯（huî-iô）的一角，畫面內底有兩个少年的瓷仔工當咧𢯾粗瓷（tshoo-huî）仔甕，實實在在畫出手面趁食的形影，拚勢的模樣看著真自然樸實，後壁顯目的瓷窯占欲規幅圖的兩份一，毋但直接點出主題，𠕇篤(tīng-tauh)的構圖予規个畫面看著真穩定，塗跤疊幾若跤粗瓷仔甕，照實表現出工課場（khang-khuè-tiûnn）的情景，規个工場全全瓷仔窯衝出來的燒風，藝術家用土色（thóo-sik）來做規幅圖的主色，漚黃色的瓷窯、烏殕土色的粗瓷仔甕佮人物皮肉的色緻和齊協調，整體來講，人佮景攏處理甲真好勢，實心實意有撙節，作品毋是干焦描寫拍拚做工的趁食人，臺灣傳統鄉土文化佮燒瓷的媠嘛呵咾有著。
出處：王雅玲，國立臺灣美術館典藏詮釋資料，2025。