台語譯文：
藍蔭鼎（1903－1979），宜蘭（Gî-lân）羅東人。羅東公學校出業了後，母校聘伊做美術教員，綴石川欽一郎（Tsio̍h-tshuan　Khim-it-lông）（1871－1945）學畫圖，受石川影響真深。畫水彩，規世人用臺灣風土人文做主題，而且積極參加國際性的畫展，捌予人邀請去義、法、美各國展出。
這幅是紙本彩墨（tsuá-pún tshái-ba̍k）人物畫（jîn/lîn-bu̍t-uē）。作者本身致心咧臺灣本土生活（pún-thóo sing-ua̍h）的主題，這款主題也展現佇這个作品內底。幾若个討海人（thó-hái-lâng）佮魚鮮（hî-tshinn）散佈規个畫面，不而過，這幅圖的焦點是佇正爿的三份一（sann-hūn-tsi̍t）。討海人揹一尾佮人平懸的魚仔，S型的大尾魚順討海人略仔痀痀（ku-ku）的姿勢垂（suê/suî）落來，魚尾的線條接紲倒爿囥佇塗跤彼幾尾魚仔，閣有後壁兩个討海人擔魚仔的情景，成做一个真有韻律閣活跳的視覺效果。
這幅圖內底人物的面無畫出來，通敨的筆法簡單畫出人佮物的關係，袂輸速寫的畫法，煞共討海人的姿態畫甲真活氣，用背景留白的方式，將討海人拍拚做工課的情景表現甲生真活掠。
出處：王雅玲，國立臺灣美術館典藏詮釋資料，2025。