台語譯文：
畫面內底的三隻牛（gû）行仝一向，姿勢、體格欲仝欲仝，牛頭、頷頸、尻脊骿的線條起落甲真自然，跤步穩重實在，整體形成綿綿有韻律的曲線，厚重的量感佮無激樣的塑造筆法，體現佇作品的每一个細節頂面。對動態結構處理的功夫，展現對動物生態的斟酌觀察閣有對自然的敬畏，按呢的風格佮臺灣早期農業社會（lông-gia̍p　siā-huē）的氣味真倚，以物寄情（í bu̍t kià-tsîng），用物件來寄託思念故鄉（kòo-hiong）的感情，呈現平和閣飽滇的張力。
作者運用淺浮雕（tshiân-phû-tiau）技法，安排複雜的景深，予畫面看著袂遮爾齷齪，佇主體牛仔的前後順序安排，筋骨藏佇體內的體量感（thé-liōng-kám），典雅無刁工膨風的動態表現，毋過每一个部份幼密相牽、相連，呈現出一種靜態的節奏，唌觀者的視線佇作品前後頂下踅無停歇。
寫實就是寫精神的真實，作品用簡單樸實的形態來表現內在的活力，這種風格佮作者的個性佮生活環境真有關係，傳達出一種現實感佮性命力。
出處：王雅玲，國立臺灣美術館典藏詮釋資料，2025。