譯文：
林智信1936年佇臺南縣歸仁鄉紅瓦厝仔出世，1955年臺南師範藝師科出業了後佇新化鎮那拔國民學校教冊，對環境煞無蓋適應，自按呢去做兵四個月，紲落來換去做關廟國小的教師，佇遐有吳晚得校長共伊鬥相伨，伊就盡心盡力、積極推動美術教育佮版畫教學，1965年著著全國美術教育特殊貢獻優良教師獎，1996年提著中華民國版畫學會頒發的「金璽獎（Kim-sú-tsióng）」、第十九屆吳三連西畫類藝術獎；藝術創作多元閣毋捌斷，早期拍拚做版畫，上𠢕刻柴，烏白為主，無就是水印（tsuí-ìn）掛手工漆色，紲落來轉向類木刻（樹奶版（tshiū-ling-pán）多版套色，抑是木心枋、me-lí-á枋的大幅版畫），其中〈迎媽祖〉這幅上蓋動人心（tōng-jîn-sim），會當講是世間上長的版畫。林智信版畫創作專攻浮版（phû-pán），特別佮意鑯刀（tshiàm-to）佇版面行徙、出力刻佮鑿（tsha̍k）的感覺、佮留落來的刀痕；取材主要攏是臺灣農村（lông-tshuan）景象閣有傳統（thuân-thóng）民俗（bîn-sio̍k）風情。
〈養鴨子〉是1974年的作品。仝一年入選英國第四屆國際版畫雙年展，也有入選挪威第二屆國際版畫雙年展。1980年代以前的臺灣農村，基本的生產單位是家庭，徛家外口飼寡雞、鴨、鵝、豬、牛遮的精牲仔，靠人工自給自足（tsū-kip tsū-tsiok）。林智信用飼鴨（tshī-ah）做主題，記錄時代的意義、反映社會的景象，樹奶版雕版，刀法紲拍，油性印墨，色水飽滇，色緻顯目；背景佮遠景的蓮花色水真和諧，予女主角佮這陣鴨仔看著閣較搭峇（tah-bā）。
出處：王雅玲，國立臺灣美術館典藏詮釋資料，2025。