台語譯文：
這幅圖特寫一个頭鬃尾仔編長長，穿一軀紺色旗袍（khóng-sik　kî-phâu）、白色襪仔、坦身坐的少女（siàu-lú/lí）。少女的兩肢跤相袚，頂身略仔向向（ànn-ànn），倒手托佇地板，予身軀袂重頭輕。正手提一枝帶葉的花，注神咧看頭前，若像咧想啥仝款。陳敬輝畫這幅圖的時，已經佇淡水高等女校（Tām-tsuí　Ko-tíng　Lú/Lí-hāu）教冊，這幅圖凡勢就是伊的學生做moo-lé-luh畫的。畫中人物（jîn/lîn-bu̍t）的造形、姿勢攏誠頂真，甚至相當符合人體骨格佮藝用解剖學（gē-iōng kái-phóo-ha̍k）原理，咱對遮就知伊素描的功夫有偌爾實腹。另外，伊的線條優雅閣會伸勾，就親像王白淵（1902-1965）對伊的作品的評論：「線條聲尾綿長，詩情飽滇。」的描述。這幅圖會當講是陳敬輝上有代表性的作品之一。
出處：王雅玲，國立臺灣美術館典藏詮釋資料，2025。