台語譯文：
這幅〈酬謝神恩〉紙本膠彩畫，是佇1991年畫的。圖內底的王爺（Ông-iâ）佛仔（pu̍t-á）閣有彼隻親像欲衝出去的柴馬（tshâ-bé），攏是用較理性的幾何線（kí-hô-suànn）描形才閣漆色的平面表現手路，兩身下底攏有畫台仔（tâi-á），按呢𫞼著會較在，可見遮的攏是人做出來欲囥予人祭拜的佛仔。背景煙霧茫茫，略略仔看會出正面廟頂的形體，敢若是放炮（pàng-phàu）放甲規个坱蓬蓬（ing-phōng-phōng），柴馬的四肢跤頭趺邊仔，攏有浮飄（phû-phiau）一絲紫色的雲氣，加添一寡象徵性的夢幻氣氛。正爿下跤空白的所在用行草書寫「草如」，並且頓刻沉的「草如」肖形印（siàu-hîng-ìn）。
雖然主題是〈酬謝神恩〉，普通時較慣勢客觀寫生的蔡草如，佇這件作品內底，煞畫出全然無仝表現的風格，顛倒是試用較有造型的心象表現（sim-siōng piáu-hiān）這款手法，用類似幾何的筆線共主題物象畫甲親像是用紙拗出來的。畫這幅圖的時，蔡草如已經73歲，猶是迒大步去試遮爾大的改變，予咱知影伊仝款維持一粒精進自己的企圖心，佮真濟藝術界人士，往往若食老了後，所畫的風格就會愈來愈保守的現象真無仝。
王雅玲，國立臺灣美術館典藏詮釋資料，2025。