台語譯文：
〈烏來（U-lai）瀑布〉這幅作品，佮陳慧坤創作這條路裡轉斡改變的彼幅重要、關鍵的作品〈能高瀑布〉是仝一年完成的（1951），1950年代初期，臺灣藝文界捌發生「正統國畫之爭（tsiànn-thóng-kok-uē tsi tsing）」的論戰，致使去日本留學，閣捌佇日本時代幾偌改以東洋畫入選臺、府、省展，並且佇1951年予人聘請去臺灣師大美術系教冊的陳慧坤真有壓力，所以這段時間陳慧坤創作的這兩幅水沖（tsuí-tshiâng）題材的作品，除了是陳慧坤替紲落來一系列寫實（siá-si̍t）風景（hong-kíng）圖 來起鼓掠外，也誠有中國傳統山水畫的構圖特色，嘛是陳慧坤逐項試看覓佮學習了後對「正統國畫之爭」的一个積極的回應。尾仔佇1977年，陳慧坤畫另外一幅〈烏來瀑布〉，這時陳氏已經確立伊個人畫圖的風格，處理的手路佮效果會使講已經全然脫離中國畫的影響，也因為這兩幅仝題材的作品畫的時間相離26年，風格佮筆法完全無仝款，予這件作品有真重要的研究價值。
出處：王雅玲，國立臺灣美術館典藏詮釋資料，2025。