台語譯文：
林慶雲（1927-2003），佇臺灣屏東縣出世，尾仔搬去東港鎮蹛。1957年佇家鄉組織同好會（tông-hònn-huē）「東光攝影會」，定期舉辦例會（lē-huē）的活動，1965 年創立「單鏡頭攝影俱樂部（tan-kiànn-thâu　liap-iánn khū-lo̍k-pōo）」共屏東、潮州、東港等等地區仝款愛翕相（hip-siòng）的朋友箍倚來，和李秀雲、劉安明攏成做台灣民初南部地區重要的攝影家前輩。伊所翕的作品主要是戰後的臺灣，這時拄好是迎新棄舊（ngiâ-sin-khì-kū）、世事改變的年代。攝影這方面綴鄉土文學發展，反映1970年代強烈的本土意識（pún-thóo ì-sik）。對時代的目睭佮社會的良心來起行，紀錄鄉村（hiong-tshun）、日常周邊的人物，用客觀的角度共社會發展的地方生活翕落來。
順河邊較懸勢的所在，遮的婦人人照順序排列當咧洗衫仔褲，規个畫面是彎彎斡斡的曲線，延伸出一種看著真有韻律感的效果。早期農業社會攏是查埔人出外，查某人扞厝內（huānn tshù-lāi）較濟，洗衫（sé-sann）煮飯成做傳統女性的義務。攝影家用這張作品來紀錄，無洗衫機的年代婦女（hū-lí/lú）向腰著愛向規晡，無論啥物季節都愛共厝內人洗衫仔褲這款日常的生活，也顯露出女性溫馴閣儼硬（giám-ngē）的形影。
王雅玲，國立臺灣美術館典藏詮釋資料，2025。