台語譯文：
林之助（1917–2008），臺中大雅的仕紳家庭出身的子弟，12歲就去日本讀冊，日本帝國美術學校（這馬是武藏野美術大學）出業，1940年以作品〈朝涼〉入選日本紀元2600年奉祝展。轉來臺灣了後捌佇台中師專（這馬的臺中教育大學）、東海大學教冊，閣有成立「臺灣膠彩畫協會」，積極培育膠彩畫的人才，1977年提出「膠彩畫」正名，通人講伊是臺灣膠彩畫頭一人。
這幅作品〈炊煙〉是畫60年代簡單起的木造厝宅（bo̍k-tsō tshù-the̍h），以徛直的長幅檫仔（tshat-á）來表現西方畫的單點透視（tan-tiám thàu-sī）空間，倒手爿的厝經過剪裁（tsián-tshâi）看著閣較長繚（tn̂g-liâu）瘦抽（sán-thiu），比起來，正手爿的厝前後懸懸低低，閣有煙筒火薰（ian-tâng hué-hun）寬寬仔焚（ûn），誠心適閣真有變化，視線對正爿下仔看過去，經過掃帚、水缸、鴨陣（ah-tīn）等等遮的景物，才閣看對遠遠的挑夫（thiau-hu），一靜一動（it-tsīng it-tōng）的構圖安排真巧步。
表現的技法來講，佮傳統的畫形添彩（uē-hîng thinn-tshái）技法無仝，較無注重線條的表現力，重視細節質感的刻畫，色水無一致的柴枋花逝（tshâ-pang hue-tsuā）、生鉎的鉛鉼厝頂（iân-phiánn tshù-tíng）佮花點花點的白牆塗壁（pe̍h-tshiûnn thôo-piah）……等，逐項都綿爛（mî-nuā）畫，全然展現出畫家斟酌觀察的寫生技巧（siá-sing ki-khá）。雖然畫的主題是狹狹的巷仔舊厝，毋過，伊的設色猶是表現出畫家一貫清新高雅的特色，予咱看著恬靜離俗（lī-sio̍k）的畫面美感，綴風絲仔那飛那懸的煙筒火薰，毋但加添視覺的動態感受，閣予真濟人想起囡仔時代的記持。
出處：王雅玲，國立臺灣美術館典藏詮釋資料，2025。