台語譯文：
這是一件大尺幅的水印柴刻（tsuí-ìn tshâ-khik）作品，描畫囡仔佇庄跤草埔咧𨑨迌，構圖真在（tsāi）閣活潑，用色鮮明（sian-bîng）真媠款，線逝有力閣明確，掠著囡仔天真注神的情態，畫面內底歡喜快樂滿滿是，閣有十足的性命力，樸實感心。「灌蟋蟀仔（kuàn sih-sut-á）/灌杜猴（kuàn tōo-kâu）」是農業社會（lông-gia̍p siā-huē）農村囡仔（gín-á）日常的議量（gī-niū），佇田裡佮草埔揣看佗位有覕蟋蟀仔/杜猴，灌水入去蟋蟀仔空（khang）/杜猴空共𪜶逼出來，才閣共這寡掠著的蟋蟀仔/杜猴捎來相咬比賽，這種就地取材的耍法差不多是彼當陣的人共同的回憶，純真閣自然。正爿頂仔有刻唸謠『荒野田間蟋蟀叫，村童攜水輕步找，把瓶注水引出牠，你灌我抓樂陶陶』，通表現這个情境，就親像咧講一个故事。
有「草地人」名號的林智信，佇兒童美術教育佮版畫創作下真濟心神，伊的柴刻版畫名聲迵國際，伊的作品樸實掂篤（tìm-táu），蓋有鄉土情懷，作穡人出身予伊共家己對鄉土的熱愛轉化做藝術作品。上頭主要的創作是油印版畫，1984年開始大量創作水印柴刻版畫，表現囡仔時代佇田裡𨑨迌的情景，用圖像化的記錄來表達伊對囡仔時代的數念（siàu-liām）。畫面色彩明麗，選擇先硩印浮線才閣家己漆色的方式，色水豐富多變，這款手路受著日本版畫大師棟方志功的啟發，這幅圖就是用這款技法完成的作品。
賴欣宜，國立臺灣美術館典藏詮釋資料，2025。