台語譯文：
這幅作品用鬥圖（tàu-tôo）的方式共孫中山（Sun　Tiong-san）佮毛澤東（Môo Ti̍k-tong）的人相（jîn/lîn-siōng）合做伙，這種囥鬥陣的手路畫中有話，袂輸是共臺海兩岸（Tâi-hái lióng-huānn）交纏的近代歷史提來變（pìnn）𨑨迌，這中間的對立佮矛盾的政治（tsìng-tī）情結予人看真明。「三民主義（Sam-bîn Tsú-gī）統一中國」是40年長久以來戒嚴統治的過程中，黨國機器所建構起來的一个大夢，毋過臺灣、大陸兩爿做對頭，閣有國際地位的勢力消長，予這个夢想著面對現實嚴格的考驗，嘛予臺灣的民眾對這寡議題普遍攏真矛盾、看甲花翱翱（hue-kô-kô）。這幅作品利用「鬥圖」來表現這个神秘閣歹收煞的關係，國父的影像對應臺灣「三民主義統一中國」的政治宣傳口號，啊毛澤東是對應大陸「解放臺灣統一中國」的野心佮企圖，兩个歷史人物啥人是本尊啥人是分身，佇這款誠僫分明的詭計佮曖昧內底，對「統一」這个政治修辭倒剾正削（tò-khau　tsiànn-siah）咧質問，而且講出臺海兩岸因為長期滾絞、毋相讓，彼種微妙的對立狀態佮政治現實。
出處：王雅玲，國立臺灣美術館典藏詮釋資料，2025。