台語譯文：
作品內底上大粒的抱枕（phō-tsím）代表聯合國（Liân-ha̍p-kok），其他細粒的國旗（kok-kî）抱枕是代表臺灣的邦交國（pang-kau-kok）。臺灣自1971年退出聯合國了後，中國政府就想空想縫、無所不至咧全面打壓臺灣的外交空間，爭取邦交國就按呢成做臺海兩岸政治比力的戰場。中國費盡心機咧壓迫臺灣，予咱臺灣攏著愛開真濟氣力、金錢佮資源主動去佮肯和咱結盟的邦交國盤撋、熱情相款待，因為𪜶是替咱臺灣佇聯合國這个重要的國際場域（tiûnn-hi̍k）出聲唯一的管道，嘛是臺灣對國際差別待遇表達抗議的放送頭。這件作品展現出臺灣佇國際世界袂得出頭的地位，作品內底的國旗抱枕自2000年創作開始起算，便若閣展覽就會增加抑是減少，反映臺灣邦交國上新的建交佮斷交的情形，這款「消長」式的創作觀念，一方面是欲反映臺灣的外交處境因為中國的壓制真凶險，閣一方面嘛會當看出這款「攬一下」的虛無佮袂信得。臺灣的邦交國面對中國威脅佮唌人的政治遊戲，毋知影當時會變心攬別人，欲予啥人攬，佮兩爿敢有真心無底代，干焦看條件有佮意無、算會和袂，終其尾只是國際政經利益交換的策略佮本錢爾爾！
賴欣宜，國立臺灣美術館典藏詮釋資料，2025。