台語譯文：
這幅〈婦人像〉內面所畫的人是張秋海結婚一冬外的牽手金澤婦志，拄做人老母的少婦（siàu-hū），坐甲四正，雙手恬囥，盤頭鬃，五官清秀，略仔點胭脂，素樸無啥妝的打扮，穿一軀衫樣單純、笑綠（tshiò-li̍k）開領的洋裝（iûnn-tsong），規个人看著樸實清靜，干焦彼跤表示已經嫁娶的手指（tshiú-tsí）清亮微微仔光，整體構圖嚴整平均，形體清楚，物像的組織堅實，用色真簡單，背景重重疊疊的筆觸，空間層次分明，顯示出伊受塞尚的理念影響，重視畫面形式佮結構的和諧，嘛追求物像內在的本質。頂真的素描技巧佮表現寫實光影色彩的用色態度，通證明伊佮藤島教師遮的人執守的外光派表現完全相仝。畫面的背景是枋橋林家佇東京的別莊，會當推斷張秋海佇1930年就蹛佇林熊徵（Lîm Hîm-ting）東京的住宅，閣代替伊管理。〈婦人像〉共伊的風格特點表現了真成功，背景的部份處理甲真簡潔豐富，干焦壁佮一台燒氣（sio-khì），壁的部份運用色彩變化，佮用幾條坦直佮坦平的線逝，做幾个有捅出來嘛有勼入去的平面出來，因為色調轉換相接蓋自然，用土黃（thóo-n̂g）佮殕色做主色，閣沓沓仔透較重的茶色，才閣變做飽滇的土黃，予看的人的目光佇這幾个光暗變化的色面頂懸徙來徙去，會當感受著空間淺淺仔，煞有對兩爿伸出去的層次感，空lo-so的壁角，干焦恬靜自由咧流動。手法也若外光派（guā-kng-phài）也若印象派，人物的外型準確，形體真明，結構嚴整，對光佮色的變化，用黃色、笑綠、暗綠、茶色、殕色等等的色塊相疊，抑是用較長的筆法輕輕仔抿出來，佇薄薄的油彩頂面呈現出額頭、鼻樑（phīnn-niû）、喙䫌（tshuì-phé/phué）的光影色彩，予人物佮暗示空間的壁堵佇內容佮形式相調和，共牽手溫柔善良佮內在雅氣的媠，表現甲真好勢，嘛用調和的色彩、穩定的構圖，聚集作者對平靜永世的追求。
出處：賴欣宜，國立臺灣美術館典藏詮釋資料，2025。