台語譯文：
木下靜涯（1887－1988），本名源重郎，日本長野縣出世，東京日本美術學校修業，受著田中亭山（1838－？）的啟蒙，學習南畫、狩野派佮大和繪，後來綴村瀨山田（1852－1917）佮竹內棲鳳（1864－1942）等等的人學畫，閣定定臨摹（lîm-bôo）京都圓山、四條派的畫作。1918年來臺灣，常任臺府展評審。
這幅所畫的是山林雪景（san-lîm suat-kíng），對畫面下半部開始看，正爿下仔有一窟水，附近有發幾若部（phō）草垺（tsháu-pû），到甲中央有一个戴瓜笠仔（kue-le̍h-á）、擔扁擔（pín-tann）的人，對倒爿下仔踏佇雪地向前行，咱閣看倒爿頭前彼間厝頂崁雪的厝，後壁有用深佮淺兩種墨（ba̍k）色、粗筆落去皂的樹林。啊若頂半部，有大量的留白，干焦用一劃淡墨（tām-ba̍k），描出倒爿面的山形。
木下氏咧畫圖，主要用墨畫佮重彩來表現，親像中央用墨色畫樹林的筆法，是伊畫墨水畫定定用的「待水（thāi-tsuí）」技法，用重墨呈現樹林的溡潤（tshî-lùn），才閣用淡墨落去𪐞（tòo），就現出景色空間的頭前後壁，營造筆墨特色的雅趣意境。
出處：賴欣宜，國立臺灣美術館典藏詮釋資料，2025。