台語譯文：
這幅圖特寫原住民（guân-tsū-bîn）老阿婆（lāu-a-pô）含薰吹（hun-tshue）坐佇塗跤食薰，若像咧想啥想甲踅神的形影。正爿下跤徛名「草如」，頓陰刻「草如」的印仔。老阿婆頭頂包烏色的頭巾，穿一領青色舊衫，紅布邊的烏裙、烏色跤紮（kha-tsat），兩肢跤褪赤赤。較無仝是，頭巾佮額仔的敆逝（kap-tsuā），有楔規排的葉仔，凡勢是用來閘日的。老阿婆面頂密喌喌攏是歲月風霜（suè-gua̍t hong-song）的皺痕，面色看著誠忝頭。身軀邊和尻脊後的斗籠佮竹籃，表示這是伊欲做工課進前小歇一下。薰吹頭前略略仔衝煙，是畫面內底唯一的動態，替這个恬靜的畫境加添活氣。
相袚的手盤、手指頭仔到手節，攏有刺花（tshiah-hue），記錄族群文化的特殊風俗；老阿婆的面，嘛呈現體質人類學的原住民面型特徵。畫內底膠彩和水墨濫咧用，色彩和墨互相煥發（huàn-huat）。蔡草如真少這款針對原住民人物特寫的畫作，這幅1967年所畫的原住民老阿婆，佇伊整體畫作內底，因為「物以稀為貴（bu̍t í hi uî kuì）」的緣故，而且品質袂䆀，所以予人感覺是真有意義的一件作品。
王雅玲，國立臺灣美術館典藏詮釋資料，2025。