台語譯文：
〈再見春秋閣〉這件一鏡到底（tsi̍t-kiànn-kàu-té/tué）的影像作品是吳天章2010年轉向影像藝術發展了後真重要的一个起鼓，同時，這嘛是藝術家代表臺灣參加「2015年威尼斯雙年展」內面「別說再見」個展的時所展出的大型影像裝置作品。風格接紲伊一貫「假」、「倯」，而且帶淡薄仔怪奇氣氛的特色，閣結合機械裝置去激出各種視覺影像的魔幻效果。可比講佇這兩件作品內底，就有模擬舞台開幕抑是換幕的形式，毋過「掀開」的毋是布簾仔，是數位影像，數位影像後製布簾開幕效果對現在的技術來講是桌頂拈柑，毋過吳天章煞費氣費觸做一台油壓的機器手，共一幅裱褙（pió-puè）的大型靜態圖像沓沓仔徙離開作品播送（pòo-sàng）的範圍，當做規个作品的曲頭（khik-thâu）。無用影像的數位介面彼款較輕可的方式來快速完成這个幻效，重點佇咧就算畫面效果真相仝，毋過事實上異質介面運作之間幼細的精差，感官咧接收就有影會小可仔知影，一種感官猶未智覺著進前就已經發動的感受性，就是吳天章所追求的「魔術（môo-su̍t）」。伊家己捌講：「魔術是無法度用目睭否定（hónn-tīng）眼前看著的真實，但是這本質是假的。特技的本質煞是真的。真佮假，就佇某一種心理空間。」 同時這款刁意故強調伊的「假」煞傳達伊本質的「真」的「魔術」幻效，也有延續去影像表現的內容當中(一鏡到底的變裝秀（piàn-tsong-siù）、皮仔面罩（phuê/phê-á　bīn-tà）佮布景檫仔（pòo-kíng　tshat-á）切換等等)，見真講，佮伊所致重的某一種袂輸若魔神仔暗伏（àm-ho̍k）的臺灣歷史佮記持互相叫應，一種無法簡單用「否定」就通消散的因子（in-tsú）。
出處：王雅玲，國立臺灣美術館典藏詮釋資料，2025。