台語譯文：
這幅圖是一幅淡彩練習，用水墨速寫（sok-siá）一个夯（giâ）農具、牽水牛寬寬仔咧行的作田人（tsoh-tshân-lâng）。正爿頂仔徛名「草如作」，頓刻沉（khik-tîm）的「朝窗假居（Tiau-tshong Ká-ki）」的長株印。蔡草如生成清心無貪，對身外之物看甲真開。伊從出世就蹛佇共人稅的彼間臺南市人和街45號的舊式人家厝，伊畫圖的空間真狹，袂伸跤袂出手得，誠刻苦；後來佇藝界漸漸仔出名，就徙去隔壁的人和街47號，工作室並本來的較闊，毋過仝款是稅的，因為厝是借蹛的，自按呢號做「假居」；伊自細漢就慣勢晏睏早起來，常在天拄光隨就落眠床，窗仔外天才拆箬光就共筆落墨來畫圖，所以號名做「朝窗」。「朝窗假居」就按呢成做蔡草如的畫室齋名。
這幅圖是用新筆畫一个形，落筆尖幼、半路重、收筆輕，略仔成蘭葉描（lân-hio̍h-biâu），煞無像文人畫按呢共筆尾和鋩角藏起來的彼種較覕鬚的書法筆路，筆法束結隨心袂假仙，親像現場直接用毛筆來速寫仝款，尾手用墨色來小可仔𪐞色，閣漆薄薄的色料起去。作田人擔扁擔（pín-tann），扁擔一爿掛農具，另外一爿吊竹籃。正手搦牛索（gû-soh），水牛牽咧，呈現當咧行路的狀態。雖然性質較成速寫的練習，毋過造型頂真閣自然，而且筆墨清潤，誠有畫圖的趣味。
王雅玲，國立臺灣美術館典藏詮釋資料，2025。