台語譯文：
潘麗水(1914-1995)，字雲山，臺南人。老爸是出名的畫師潘春源，從細漢綴佇老爸身軀邊汰（thuā），閣綴水墨畫家呂壁松學，昭和6年(1931)年潘麗水以作品〈畫具〉佮老爸雙雙入選第五屆「臺展」，閣佇臺北南海路臺灣教育會館展出，了後閣徙去中山堂展覽。戰後潘麗水開始從事廟寺彩繪，佇臺灣的廟寺建築界名聲真敨（tháu）。1993年提著教育部民族藝師薪傳獎，是臺灣頭一位提得這个獎的民間畫師。
這幅作品是潘麗水佇第五屆臺展東洋畫部入選的作品，嘛是潘麗水唯一保留落來完整的膠彩畫作，畫作的題材佮彼當陣時行的風景、人物、南國風情等等天差咧地，伊對日常情景出發，較倚西洋繪畫靜物形式表現，伊畫畫家家己桌頂畫圖的家私（uē-tôo ê ke-si），佮人無相仝。毋過對遮的靜物的細節，閣予咱看著藝術家個人的精神思想佮目標，親像正手爿掀開的冊頂面寫的文字佮舊建築寫生，是《吳有如真跡：名勝畫集》（Ngôo Iú-jû/lû tsin-tsik：Bîng-sìng uē-tsi̍p）的序文：「觀其畫殆不僅與以美術鳴者耶？士子讀書十萬卷，山海風俗之奇，鳥獸草木知名，非不能識也，然書之可盡信者幾何哉？一掇土之多方裏圜隔，徐霞客登竹頭屐，一生所至者幾？」。啊若倒手爿是囥第四屆臺展圖鑑（Tâi-tián tôo-kàm），這寡物件表明潘麗水規心研究畫藝、重視寫生精神（siá-sing tsing-sîn），而且拍拚佇藝術領域閣較進步的企圖心。
出處：賴欣宜，國立臺灣美術館典藏詮釋資料，2025。