台語譯文：
吳學讓（1923–2013），號退伯，四川（Sù-tshuan）岳池人。1948年杭州藝專出業了後渡海來到臺灣。佇臺海兩隔的時代背景內底，吳學讓共對故鄉（kòo-hiong）爸母的思念深深藏佇心肝底，佇臺灣建立家己的家庭。規个1970年代，吳學讓無閒咧教學佮展覽，家庭的和樂就是伊上大的安慰，所以，伊創造一款若鳥若雞若鴨若鵝的古錐符號，共家庭佮囡仔興相結合的創新風貌自按呢來起鼓。
吳學讓回想講：「較早佇阮四川的兜，常在看著隔壁村的作穡人攔（ânn）一大陣算袂清的鵝仔（gô-á）對阮門口過，一隻一隻幌頭搖尾扭尻川花的白鵝有夠古錐，長長的頷頸那kà-kà叫那伸勼，袂輸一組樂隊仝款擔頭大伐行。一禮拜有幾仔工，我攏會佇門口張等（tng-tán）彼陣鵝仔對遮過，才閣目睭金金看𪜶遠遠去。」對遮咱就知，遮的鵝仔佇吳學讓心肝內是有真豐富的象徵意涵，毋但有滿腹的故鄉記持，也有目送遠去抑是張等期待的意思藏佇內底。
〈期待（盼）〉這幅畫是橫披（huâinn-phi）的，重疊交接的墨線共聚散疏密的鵝陣畫出一个型，𪜶攏共頷頸伸長、擔頭咧看彼隻畫幅頂面的蜘蛛（ti-tu）。墨線畫出來的蜘蛛網後壁，用沒骨（bu̍t-kut）𪐞色的技法來畫紅色的太陽。鵝陣隨隻隨隻開喙kà-kà叫，規幅圖滿滿是柑帶紅的日頭光箍仔（ji̍t/li̍t-thâu kng-khoo-á），經（kenn/kinn）出溫情歡喜的幸福期待。
出處：王雅玲，國立臺灣美術館點詮釋資料，2025。