台語譯文：
天頂有一寡白雲咧飛，遠遠干焦看著廟寺（biō-sī）的翹脊（khiàu-tsit）佮頂面龍（liông）的姿勢，目睭內所見全全是市仔（tshī-á）繁華的榮景，布棚跤人真濟，人陣來來去去，大樹跤一个買好欲轉的太太拄行對邊仔過，青lìng-lìng真茂的大樹公（tuā-tshiū-kong）袂輸佇遮見證這个所在長躼躼的歲月歷程。佇農業為主的傳統社會，赴墟（hù-hi）是真要緊的活動，一个市仔共四箍圍仔居民的日用扞牢牢，無論是農作物佮手工藝品的買賣抑是交換，抑是講欲買日用品，甚至佇這種場合人佮人互相交陪盤撋連絡，攏是足重要的交際場所。這个作品的尺幅細細个仔，柴刻版畫（tshâ-khik pán-uē）主要有白底烏巡的陽刻法佮烏底白巡的陰刻技法，作者揀這款幼密的陰刻形式來刻畫這幅構圖密實的圖，長條形的平面空間共看遠的視野彼種深佮闊配搭甲真拄好，前中後景一重疊過一重，用濟閣密的線條來共赴墟的情景刻甲詳細閣幼膩。空間的安排有密有櫳，景物的刻畫有幼有粗，運刀掌握甲真好勢，畫面看著調和豐富，毋但有掠著柴刻版畫特有的柴佮刀的氣口，嘛有真深的人情味。
王雅玲，國立臺灣美術館典藏詮釋資料，2025。