台語譯文：
陳其茂綴國民政府來臺灣了後，捌去過花蓮的山地部落，觀察臺灣山林佮原住民的生活樣貌，對臺灣的生態和民情了解較深，所畫出來的寫實作品就較會觸著觀賞者的心肝穎，來產生回響佮共鳴（kiōng-bîng）。這幅是咧畫郊外的風景，作者用心安排構圖，景物一重疊過一重，用單點透視（tan-tiám thàu-sī）的構圖方式，對近到遠，對大到細，佇有限的畫面內底予咱看著遮爾深遠曠闊的土地風光。規畫面的物像，雖然敢若刻甲密喌喌，毋過真有次序、袂雜亂，柴刻版畫（tshâ-khik pán-uē）的血脈，盡看就看線逝的表現，畫面內底用無仝的線條技法來刻無仝的植物，注神共看就敢若看著無仝草木的性命力頭，臺灣山芋（Tâi-uân suann-ōo）做上頭前，後壁是枯藤（koo-tîn）、椰樹（iâ-tshiū），中央予植物圍起來的空間，安排陳其茂真愛表現的題材：牛的形影，予構圖袂全全干焦有植物，閣摻異元素（ī-guân-sòo）入來調和平衡感，嘛予一幅自然的生態圖更加完整。
賴欣宜，國立臺灣美術館典藏詮釋資料，2025。