楚戈（1931－2011）本名袁德星，佇中國湖南省出世，是詩人、現代水墨畫家、藝術評論家，嘛是美術史家。1949年綴軍隊來臺灣了後，加入新文學現代派詩社，並且用藝評支持五月畫會佮東方畫會的現代繪畫作品。1968年進入故宮博物院器物處食頭路，長年投入青銅器研究，捌出《龍史》這本冊，探討古器物頂面龍紋的演變。伊將遠古紋飾佮中國結索仔（kat-soh-á）的藝術運用佇伊的創作，形成線條性強烈的個人風格。
楚戈的圖內面，彎曲蝹蜷（uan-khiau un-khûn）的線條來自遠古蛇紋、龍紋的意象，伊的畫風對一線畫到使用排筆（pâi-pit）來構成濟條線同齊進行的複雜效果。〈重疊的宇宙〉是伊成熟尾期的作品，畫面用多重的意象佮符號構成，相疊的圓形佮四角形區面有「天圓地方（thinn înn tē hong）」的象徵，兩个圓形是日頭（ji̍t/li̍t-thâu）佮月娘（gue̍h/ge̍h-niû），一个用烏墨𪐞印敢若月球表面、一个是金光閃閃的太陽；長篙形的區面用排筆畫出來的波紋滿滿是、敢若絲仔線相牽纏的線逝，閣有頂面規个甲骨文（kah-kut-bûn）、金文（kim-bûn）的殘片，佇畫紙頂懸展現時間佮空間交接重疊的宇宙觀。
賴欣宜，國立臺灣美術館典藏詮釋資料，2025。