台語譯文：
林慶雲（1927-2003），是一名屏東的攝影師，故鄉佇林邊鄉的漁村，二戰時期真不幸捌做日本兵，毋過嘛顛倒因為按呢得著日軍的軍用相機，才佮攝影結緣。戰爭結束了後，捌佇《中華日報》佮《新生報》食頭路，報社特聘伊為伊的家鄉屏東做新聞報導的工課，閒時嘛一直有咧翕相。林慶雲上𠢕佇街路翕平凡的日常、掠著人物的神情，為地方本土留落來真濟寶貴的視覺記錄。1960年成立「東光攝影會」和「單鏡頭攝影俱樂部」，共南部地區的攝影同好箍做伙，通記錄臺灣的時代影像，有真濟民初的鄉土人文景象留落來。
這幅作品是一位縛摠（pa̍k-tsáng）、穿客家傳統衫（Kheh-ka thuân-thóng-sann）的婦人人做主角，佇溪底（khe/khue-té）咧撋衫（nuá sann），愛注意的是人物是徛咧洗衫，主要是為著安全設想，隨時警戒避免危險。這號習慣嘛一直傳落來到後代，是客家婦女典型的洗衫方式。時代咧改變，今（tann）雖然毋免閣去溪仔邊洗衫，毋過佇林慶雲的作品內底，予咱會當了解彼陣的風情，體會早前臺灣人生活的艱難。
賴欣宜，國立臺灣美術館典藏詮釋資料，2025。