台語譯文：
武玉玲(1971-)，佇臺灣屏東三地門鄉出世，是排灣族（Pâi-uan-tso̍k）原民藝術家，自細漢學習原民傳統編織技藝（Guân-bîn thuân-thóng pian-tsit ki-gē），頭仔出社會彼陣接觸著民間飾品（sik-phín）佮現代首飾（siú-sik）工藝，這寡成長經歷攏是伊後來創作真重要的基礎佮養份。2009年因為八八風災的衝擊，真濟族人無法度著愛遷徙，予武玉玲的創作視點對妝娗造形的構成，轉向個人、族群佮自然之間閣較內在情感面的連結關係，而且結合頭前所講的兩種技藝，發展軟雕塑（nńg-tiau-sok）佮裝置類型作品為主。武玉玲捌提著2018年「Pulima藝術獎」視覺藝術首獎，這幾年重要的參展經歷包括2020年日本第七屆橫濱三年展、2020年台北雙年展、2021年澳洲第十屆亞太三年展、2022年第二十三屆雪梨雙年展等。這件〈Vuvu的花園I〉，藝術家家己介紹有講：「這件作品是2020年創作的，因為八八風災部落遷徙去新的土地，這塊土地毋是阮的，是政府的，部落裡的序大數念較早部落有屬於家己的田地佮花園，才會來發想這件作品。」藝術家用伊專長用縛纏（pa̍k-tînn）佮用勾針（kau-tsiam）刺的技法，來編織出記持內底家鄉的地形、花園，伊感覺「縛纏」本身真有溫度，勾連纓纏的內面有部落的記持，紅豔的色緻就親像斷袂離的血脈佮性命無限的傳承。
出處：賴欣宜，國立臺灣美術館典藏詮釋資料，2025。