台語譯文：
陳其茂差不多是1940年代尾期開始柴刻的創作，彼時柴刻版畫（tshâ-khik-pán-uē）的創作者真濟攏受著作家魯迅的精神感召（kám-tiàu），用戰鬥柴刻（tsiàn-tàu-tshâ-khik）來表達對社會的關懷佮意念，陳其茂開始戰鬥柴刻創作無偌久了後，綴國民政府來臺灣，受著詩人汪玉岑的影響，研究英國柴刻版畫，意著英國柴刻的幼路佮詩意，隨就改對伊尾仔上蓋上手的抒情柴刻（su-tsîng tshâ-khik）去發展。對伊的作品《牧之一》看會出來作者營造意境的功夫誠深，嘛是抒情柴刻的體現，用陰刻法來表現烏底白線的畫面，刻劃甲真幼工，構圖複雜一層疊過一層，展現出郊野山林（kau-iá　suann-nâ）嶄然曠闊的景緻。兩个飼牛囡仔（tshī-gû gín-á）尻脊骿並佇大樹跤咧歇睏，目睭那相彼兩隻當咧揣食的牛仔囝，毋但是描畫飼牛囡仔的生活，嘛親像唸歌來呵咾大自然（tāi-tsū-jiân）。共刀當做筆幼絲仔描繪無仝樹木的姿態、樹葉的特徵和密喌喌的草地，毋但展現大自然的性命力，也予咱看著陳其茂的刀法有影是真扭掠，利用各種刀具和多變的線條構成豐富的畫面。干焦頭前的小路（sió-lōo）就看著無仝的刻劃，曲線無接逝、平排的短線、用圓刀挖出大大細細的圓點，佮邊仔的石頭（tsio̍h-thâu）做伙形成一條路仔。作者伊巧妙和頂真的構圖，予這个作品唌人看了閣再看，愈斟酌看就愈看著真濟無注意著的所在。
出處：賴欣宜，國立臺灣美術館典藏詮釋資料，2025。