台語譯文：
雲林出世的黃冬富，毋但年拄年拍拚做美術教育，藝術創作嘛表現甲真出擢，得著教育部、省展等等的獎項。水墨作品〈榕蔭消夏〉描畫熱天人耍水的好滋味，一欉榕仔王（tshîng-á-ông）邊仔的溪埔，飼牛囡仔（tshī-gû gín-á）那騎水牛（tsuí-gû）那納涼不止仔爽神，表現出作𥣱人清閒、無腹腸的形象，規幅圖以烏墨（oo-ba̍k）為主，插濫一寡色彩，黃冬富共榕仔畫了較斟酌，樹頭遐規拖規膏(kui-thua-kui-kô)的根佮發甲真茂(ām)的樹葉攏畫甲誠幼路，用澹筆簡單畫出老欉（lāu-tsâng）的形佮椏，才閣沐赤色佮朱紅起去，予畫面加真活氣，焦拭法（ta-tshit-huat）描畫自然垂落來的榕仔鬚，樣相袂輸一位序大老步定閣有智慧，恬恬咧看這个世間萬事萬物。人物這方面，藝術家用幼筆初初畫一个形，除了共飼牛囡仔沐皮膚色掠外，閣用較汫(tsiánn)的墨色來𪐞(tòo)出水牛的形體，紲拍(suà-phah)的線條畫出來的水泱(tsuí-iann)自然閣活潑，表現出熱天人透心涼的景緻，看著心肝頭綴咧放冗，心情齊快活起來。
出處：王雅玲，國立臺灣美術館典藏詮釋資料，2025。