台語譯文：
余承堯（1898－1993），福建永春人，本底是軍人，後來經商，1949年綴國民政府撤退來臺灣，1954年56歲的時，開始創作頭一張作品，無接別人的技術，嘛無學古早人畫，伊是一位素人畫家，伊的新山水畫（san-suí-uē）上蓋出名。
這幅山水畫是余氏尾期的作品，空間佈局的表現，雖然看會著中國傳統的三遠法（sam-uán-huat），毋過煞毋是典型的畫法，伊是憑三遠法佮對天頂看落來的視角，相結合出來的徙動視點，來表現出山嶺佮山嶺之間堅固的關係。毋但按呢，中央的山體較敧對畫面正爿去體現空間的佈置，已經改良宋代院體山水畫內面，彼款主山堂堂𫞼佇中央的型態。對這二點會用得知影余氏毋是干焦學古早人畫圖爾爾，伊用伊人生旅程當中的山水體驗，開創家己本身的創作風格。
佇形體構成表現的部份，畫家用一塊一塊的塊面（khuài-bīn）形成幾若个山體單元，閣用獨創的十字型網仔結構，佮亂筆皴（luān-pit-tshun）的手路來形塑山嶺（suann-niá）。用色的部份，是用烏墨、紅色、青色、黃色佮柑仔色來表現山水樹石，遠山就孤用藍色、青色兩色來畫，看起來閣較有遙遠佮幻幻（huánn-huánn）的感受。
出處：王雅玲，國立臺灣美術館典藏詮釋資料，2025。