台語譯文：
〈晒穀〉時冬季（sî-tang-kuì）作穡（tsoh-sit）人真無閒的田園景緻，現代社會已經無啥看會著矣，顛倒是工業景觀愈來愈濟，生活環境緊張、齷齪（ak-tsak）、規格化，社會問題那來那濟，犯罪率那來那懸。作者用時冬季做主題，用庄跤的粟埕（tshik-tiânn）做背景，按算共純樸的草地風景提來佮現代社會相比較。粟埕毋但點出早前農村（lông-tshuan）佇時冬季無閒的情形，嘛共骨力作穡做伙表現出來，畫面正爿下仔雞母𤆬雞仔（ke/kue-á）囝，一口灶嘛輸人毋輸陣，佇人佮粟仔中間揣食，毋但活潑心適，閣較有庄跤樸實的感覺。這幅作品主要是用三角形佮弧形的配置來構圖。作品內底三个人合作用大拖（tuā-thua）耙粟仔（pê tshik-á），表現力頭佮美感，作者毋但安排一陣雞仔來妝娗主題，光佮影閣用厝殼壁堵、粟埕細堆的粟仔、囡仔人物等等的影來表現，畫面豐富、相插濫閣有規律，予作品袂無聊，真鬧熱款。
出處：賴欣宜，國立臺灣美術館典藏詮釋資料，2025。