台語譯文：
這幅圖是用全開的宣紙畫傳統民俗道釋（Tō-Sik）的題材，正爿頂仔用隸書（lē-su）寫「五福三多 富貴壽考」，紲落閣用半草楷（puànn-tshó-khái）寫「歲在庚戌年二月 蔡草如」，刻沉的「草如」印。畫內底的題材是臺灣宮廟彩繪定定看著的。這幅圖的焦點畫—个全副武裝（tsuân-hù-bú-tsong）的大將軍，徛佇松樹跤，擔頭拱手（kióng-tshiú），向駕雲來到地的仙女行禮致意。將軍的尻脊後，副官倒手攑一支槍（tshiunn），正手搝一隻白馬的馬索（bé-soh）；雲頂的仙女，倒爿佮正爿後壁攏有一个侍女（sī-lú）咧服侍；其中一个侍女雙手攑一支長扇，另外一个侍女雙手捀（phâng）兩卷綾羅綢緞（lîng-lô-tiû-tuān）的物件，內容真有神話故事（sîn-uē kòo-sū）的款式。
「五福（ngóo-hok）」講的是長壽、富貴、廉寧（liâm-lîng）、好德、善終；「三多（sam-to）」是咧講多福、多壽、多男子。攏是古早華人定定用的祝頌詞（tsiok-siōng-sû）。一个人兼精緻藝術的膠彩畫家、水墨畫家，閣有常民藝術的宮廟彩繪名師等等，真濟款身分的蔡草如，真𠢕利用各種材質的特性來相傍相成（sio-pn̄g sio-tsiânn）、互相結合。所以處理遮爾複雜的場景，伊仝款有才調共構圖和造型攏處理甲真幼路，展現伊專業畫師的功夫；另外一方面，伊佇咧處理筆墨雅味的層面，猶原是無失優雅閣袂倯氣（sông-khuì），這參一般宮廟彩繪的畫師真無仝。
王雅玲，國立臺灣美術館典藏詮釋資料，2025。