台語譯文：
這幅圖所畫的場景敢若是山內溫泉（un-tsuânn）區的旅社（lí/lú-siā）。畫家對溪崁（khe/khue-khàm）對岸的柴橋（tshâ-kiô）跤，略仔擔頭的仰視角度，取掠木造溫泉旅社的畫面。溫泉旅舍起佇坑溝墘，溪仔真掣流，溪底大大細細捅真濟圓石仔出來，溪墘有幾若位石坎（tsio̍h-gám），會當迵去旅社邊的溪底。旅社建築是三層起（sann-tsàn-khí），內面有幾若个頂身無穿衫的人並佇窗仔邊咧看山谷的風景。看著真輕鬆，就是浸溫泉了後人真神爽的感覺。遠景是發甲全草仔佮樹仔的山壁，畫內底攏無寫半字嘛無頓印仔，毋過佇溪墘有一欉木瓜欉（bo̍k-kue-tsâng），枝葉真茂閣生真濟木瓜（bo̍k-kue），略仔遮著主要的建築，毋但予景色有深佮淺的效果，嘛顯示所畫的場景應該毋是佇日本，可能佇臺灣。
畫中的木瓜樹，雖然表示應該毋是日本的景色，較有可能佇臺灣，總是這幅圖同齊用著水彩佮水墨，色調略仔殕藍殕藍（phú-nâ），佮作者去佇日本的時陣運用的色彩真接近。特別想欲提起一點，這幅圖雖然運用袂少筆線來畫、予畫面顯明，毋過基本上無刁工強調筆墨的表現機能。木造旅館的彩度佮明度，比四爿邊仔環境的殕藍色調加較懸，予主題焦點看較現。推測伊畫圖的年代，可能是蔡草如拄對日本回國的戰後初期。
賴欣宜，國立臺灣美術館典藏詮釋資料，2025。