台語譯文：
光復了後臺灣早期的柴刻版畫（tshâ-khik pán-uē）除了鬥做政治宣傳的「戰鬥版畫」，另外上濟的就是描寫臺灣的風土民情，包括對中國來的、佮咱臺灣本地的創作者，其中有真濟是記錄農家生活的作品。這件作品畫的是咱常在看著的作穡（tsoh-sit）圖，農村勞動的生活正正就是親像這幅圖，曝日作穡的婦人人（hū-jîn/lîn-lâng），褪赤跤踏水田，一逝一逝掖子（iā-tsí），毋管頂仔日頭熁（hannh），抑是跤底田塗濕熱𩚨（khiū）黏，攏著愛忍耐，土想就知影有偌艱苦，徛頭前後壁向腰直直做仝一个動作的查某人，用剪影（tsián-iánn）來表現。佮19世紀法國寫實主義大師米勒畫的《拾穗》相仝，平平是咧記錄農村生活的一部份，作者用簡單清楚閣樸實的手路做成這幅予人真感動的作品，看袂著農婦的面，畫面仝款寧靜閣莊重。咱看查某人手裡的子寬寬仔落落來，袂輸咧共咱講人類久長以來對土地的依賴、猶閣有傳湠袂盡的希望。
賴欣宜，國立臺灣美術館典藏詮釋資料，2025。