台語譯文：
〈孔雀開屏〉這件作品是林之助佇民國七十年催生（tshui-sing）臺灣膠彩畫（ka-tshái-uē）協會成立了後，所舉辦的頭一屆臺灣膠彩畫展內底展出的作品。伊用120號大尺幅膠彩「孔雀開屏」做開展的作品，所代表的意象，是對臺灣膠彩畫未來發展的願景（guān-kíng），誠有時代的意義佮歷史的價值。林之助為著畫予活龍龍，甚至家己飼孔雀（khóng-tshiok）通好逐日觀察伊的癖性佮體態的細節，而且用伊幼膩高明的寫實（siá-si̍t）功夫，共孔雀公複雜艷麗（iām-lē）佮媠色通光的翎毛（lîng-moo），幼路頂真共表現出來。前景另外一隻孔雀母是用細膩覕鬚的色水層次佮恬恬仔覆咧的姿態，表現出一種溫馴典雅的氣質，而且共孔雀公、孔雀母兩隻的特徵，以「樸實穩健（phoh-si̍t ún-kiānn）」和「大放異彩（tāi-hòng ī-tshái）」當做對臺灣膠彩畫的解說佮對未來的向望。這幅作品無論是美感的表現抑是歷史的意義攏有真重要的價值。
出處：王雅玲，國立臺灣美術館典藏詮釋資料，2025。