台語譯文：
城市繁華的大興大起（tāi-hing tāi-khí），代價往往是真濟平凡人的小哀小愁（sió-ai sió-tshiû）。這件作品的主題是都市（too-tshī）中的現代化（hiān-tāi-huà）建設，直透切入臺灣高度都市化了後的人文情境，予咱看著藏佇繁華下底，弱勢族群（jio̍k-sè tso̍k-kûn）真實的生活情景。畫內底真大phâng的高架橋（ko-kè-kiô），雷kòng-kòng予人看著會驚，地平線生冷閣鑿目（tsha̍k-ba̍k）的白光照過來，予人閣較有壓迫感。高架橋這款建築怪獸佇都市內底四界都看會著，𪜶是交通佮資源運輸的紐帶（liù-tuà），伊強勢、森嚴、焦𠕇（ta-tīng）的面貌，帶一種都會（too-huē）才有的征服、聚斂（tsū-liām）、剝削的氣氛。橋跤定定是有路無厝的孤單老人（koo-tuann-lāu-lâng）會來到遮蹛天露（tuà-thinn-lōo）的所在，𪜶攏是都會墘（too-huē-kînn）的弱勢族群，面對變化快速的都會建設，𪜶無發言權，干焦會當恬恬仔吞忍佮適應，三聲無奈，日子過甲沉重閣艱苦。畫內面酥腰酥腰、孤一人的老阿公，不管伊是草地來的老農、抑是食老躊躇徘徊的中國來臺移民，形影孤單的空虛佮肅靜，無話無句表達城市內面的小人物，面對後工業時代都市的質理快速流動變化的情形，有一種茫茫渺渺、毋知欲如何的普遍處境。
賴欣宜，國立臺灣美術館典藏詮釋資料，2025。