台語譯文：
這个作品是用口述歷史（kháu-su̍t-li̍k-sú）的方式紀錄五位蹛佇臺南、無仝族裔（tso̍k-è）的人，𪜶的性命經驗，內底有原住民（萬淑娟）、經歷日本統治的臺灣人（沈吳足）、出世佇臺灣眷村的子弟（陳亞文）、中國移民來臺灣的婦人人（陳慧蓮）、戰後來臺的外籍傳教士（紀寒竹）。這幾个人的性命經驗攏佮臺南的歷史相牽相纏，生活佇仝一个地區，煞對家己的身份認同有完全無仝款的表達，這寡故事正正呈現出臺灣的文化佮政治無法度拆分散所引起的社會問題，閣有多元文化（to-guân-bûn-huà）相濫所形成的濟濟族群矛盾。作品透過「你／我是啥人？」的問題，探討臺灣人經過移民、殖民、全球化交插的歷程了後，自我佇咧迒過無仝的環境、社會、文化脈絡的時，對「迒過」這个行動心內的滾絞佮懷疑，嘛表現出佇政治亂象、族群矛盾（tso̍k-kûn-mâu-tún）的社會氣氛內底，面對個人身份認同（sin-hūn-jīn-tông）的茫茫渺渺（bông-bông biáu-biáu）佮失落。
王雅玲，國立臺灣美術館典藏詮釋資料，2025。