台語譯文：
陳敬輝(1911-1968)，臺灣臺北新店市人。生爸（senn/sinn-pē）姓郭，毋過因為陳敬輝出世就歹育飼，過予彼陣艋舺基督教會陳清義牧師做囝，養母是馬偕病院創辦人馬偕博士的查某囝偕瑪連女士，共伊號做敬輝。陳敬輝自幼稚園就予人送去日本受教育欲二十冬，佇1924開始讀京都市立美術工藝學校，了後閣對京都市繪畫專門學校畢業。1930年陳氏才19歲就以作品〈女〉入選第四回臺展，了後閣提著臺展特選、臺日賞等等的光榮。1932年畢業轉來臺灣，入去淡水女學堂、淡江中學教冊，仝一年閣受邀請加入彼陣臺灣上大的東洋美術團體「栴檀社」（Tsian-tân-siā），尾仔閣加入「麗光會」、「六硯會」等團體。陳敬輝畫圖的風格幼膩清雅，真佮意嘛真𠢕畫人物題材，尤其是「美人圖（bí-jîn/lîn-tôo）」風格的作品人人呵咾。陳敬輝創作取材的來源真濟是日常生活，像這件第二屆省展出品的雙敆（siang-kap）作品〈琴譜〉，藝術家毋但強調頭毛、衫仔裙的花逝質感，閣共琴譜（khîm-phóo）、節拍器（tsiat-phik-khì）、室內淺拖仔（sik-lāi　tshián-thua-á）等等物品嘛囥入去，簡單利用穿插妝娗（tshīng-tshah tsng-thānn）、配件佮生活用品，就共畫中人物的身份背景、個性愛好（ài-hònn）做一下展現出來。
出處：賴欣宜，國立臺灣美術館典藏詮釋資料，2025。