台語譯文：
蒲添生1941年自日本轉來咱國了後，以塑造各界名流抑是𪜶的親屬雕像為主，真濟機會是靠伊的丈人陳澄波鬥牽成的，閣自按呢創設臺灣頭一間鑄銅（tâng）的工場，作品忠實反映當當時臺灣政治社會發展的過程佮面貌，佇伊的工作室內面，共遐爾濟的胸像（hing-siōng）略仔看過一擺，就若像咧讀臺灣早期名人的歷史，是對日本時代延續半世紀以上臺灣社會的縮影，強力打動人心。這件作品佇1944年完成，moo-lé-luh是彼陣臺北市醫護團長陳春坡（Tân Tshun-pho）醫師𪜶老母（lāu-bú），蒲浩明（雕塑家，蒲添生的後生）形容作品佮實際的人物相比，作品的量感、觸感、情感佮張力猶閣較強。消瘦mooh-mooh的面形，有明顯的塊面（khuài-bīn）佮線條，閣佮合倚的喙脣，予咱看著歲月的痕跡猶閣有女性堅強筋韌的精神，祥和的眼神有老母慈愛的寬容。
賴欣宜，國立臺灣美術館典藏詮釋資料，2025。