台語譯文：
〈彩色夢幻〉內底趣味的線條五花十色，有七个查某人（tsa-bóo-lâng）相連做規幅圖的動線，人物後壁藍色的背景妝娗密實交纏的花草（hue-tsháu），頂半畫面的紅色（âng-sik）圓弧（înn-hôo）敢若布簾（pòo-lî），構圖真浪漫夢幻。畫面內底用紺色共紅色蔭甲真顯目，利用色水的深佮淺表現豐富的色彩變化。這件作品共人體的每一个部位攏予咱看甲明明明，就若像共對象「規个展開」，放棄寫實的刻描，追求有表現性的線條佮造型，形體平面化（pênn/pînn-bīn-huà）予畫頂面的查某人可比是硩扁（teh pínn）去的薄紙遐爾仔輕báng-báng。雖然隨人有隨人的姿勢佮形體，毋過遮的查某人的眼神煞攏真親像，兩蕊目睭袂輸是鬥入去看媠的（khuànn-suí--ê）仝款，敢若想欲表現出這七个查某人有啥物相牽連。江漢東毋但吸收民間柴刻版畫（tshâ-khik pán-uē）的傳統形式佮表現手法，譬如講人物造型較譀款、幾何化（kí-hô-huà）甚至變形去來表現𪜶的樣態，閣配合運用民間藝術（bîn-kan gē-su̍t）真強烈的對比色，予伊的柴刻版畫作品毋但明麗迷人，嘛成做真有「東方」特色的「現代」版畫創作風格。
出處：賴欣宜，國立臺灣美術館典藏詮釋資料，2025。