台語譯文：
這件〈玩紙牌〉的水墨（tsuí-ba̍k）素描，是1944年畫的，彼陣蔡草如蹛佇東京，日時佇東京的情報局擔任畫圖員，暗時去川端畫學校學畫圖。畫內面有六个短頭毛學生款的少女（siàu-lú/lí），穿制服（tsè-ho̍k），佇室內的日本蓆（Ji̍t-pún-tshio̍h）坐一个圓箍仔形，真注神咧奕牌仔（ī pâi-á）。六个人屈咧坐，姿勢細膩優雅，頂身略仔向向（ànn-ànn），目睭攏釘佇咧牌仔頂面的牌局。正爿頂仔用日文題字「或る夜　伊藤宅でトランプやり。」（台譯：有一暝，佇伊藤𪜶兜奕khe-tsí-bang）。
這件群像水墨素描，構圖真有變化，隨人的動作佮表情互相有叫應、真活氣，其中干焦有倒算第三个女士，去予離畫家上倚的倒算四位用尻脊骿閘牢咧，干焦看會著半爿的面佮肩胛頭，咱若看伊的頭毛型佮表情，可能是內面較有歲的中年婦人人。上特別的是，這件素描是先用鉛筆速寫（sok-siá），才閣用淡墨（tām-ba̍k）來處理，光源對畫面倒爿頂仔落來，光影的效果真有營造畫面氣氛的路用。畫家經營這件水墨素描，通講是真用心，毋過後來是攏毋捌看著有照這張速描稿來畫的正式作品。
賴欣宜，國立臺灣美術館典藏詮釋資料，2025。