台語譯文：
蒲浩明(1944 -)是臺灣雕塑家，伊的阿爸蒲添生（Pôo Thiam-sing）是臺灣雕塑界重要的人物，伊自細漢有樣看樣，對藝術展現出真大的興趣，捌著著法國藝術家沙龍雕塑類銀牌。伊的作品結合東西方美學，注重探索性命佮自然的動態平衡，真𠢕運用材料的觸感佮紋理，伊雕塑的風格誠多元，展現出性命的力量佮幼工的美感。
這件作品呈現女性頂身（tíng-sin）的形態，袂輸是用洘秫秫（khó-tsu̍t-tsu̍t）的色料來畫圖仝款按呢塑造皮肉（phuê/phê-bah），毋過，猶是表現出女性身體的優雅軟軟（nńg-luán），予這个雕塑品整體看起來在穩閣有唌人目的動態感（tōng-thài-kám）。作品的結構簡單有力，身體略仔向天伸勻，親像規心咧感受性命的美好。
作者掌握黏塗（liâm-thôo）的可塑性，運用捻（liàm）、捏（liap）、撋（nuá）、硩（teh）等等的手路，予雕塑的表面有一款皺襞襞閣紲拍的質感，創作的重心囥佇幼膩的線條的美感。塗的材料厚實閣飽滇，表現出女性特有的曲線和韻律，總是，捅出來佮勼入去起落粗澀的質感，毋但帶來一種強烈的觸感和原始的力量，嘛和女性溫馴的形象成做對比，體現作者一貫的創作理念：對變形（piàn-hîng）內底走揣內在的力量。
出處：王雅玲，國立臺灣美術館典藏詮釋資料，2025。