台語譯文：
蘇明全(1929- )出世佇屏東東港，日本時代國校高等科畢業。29歲搬去高雄，拍拚推廣攝影教育佮國內外創作展覽交流。捌擔任全國影展、地方影展評審委員、中堅攝影學會顧問、高雄市望角攝影藝術研究會顧問。得著臺灣省攝影學會博學會士、高雄市攝影學會博學會士、英國皇家攝影學會碩學會士的光榮。作品捌予國立臺灣美術館佮高雄市立美術館典藏。2013年佮後生蘇伯欽、查某孫蘇子涵有做伙舉辦三代攝影聯展。
用寫實主義（siá-si̍t-tsú-gī）記錄早期臺灣農村生活（lông-tshuan sing-ua̍h）是蘇明全作品的特色。本作品是蘇明全的代表作之一。鏡頭內底，坐佇連通道彼兩个囡仔手比火車（hué/hé-tshia）外的風景，查埔人手骨並佇車窗、指頭仔相扯(tshé)的姿勢動作，閣有徛佇便所邊彼位少年家，成做三角構圖（sann-kak-kòo-tôo），表現出純真佮鬱卒、無仝世代的視覺對比。略仔敧敧的構圖（khi-khi ê kòo-tôo），予人感覺袂安定，實實在在記錄當當時(tng-tong-sî)人物的穿插佮時代的影跡。
出處：賴欣宜，國立臺灣美術館典藏詮釋資料，2025。