台語譯文：
呂基正（1914-1990）出世佇臺北迪化街，一世人佇廈門、臺北、神戶三地走傱。1931年讀日本神戶的神港洋畫研究所，受著伊的老師今井朝路（1896-1951）啟蒙真深，作品捌入選兵庫縣美展、全關西洋畫展真濟擺。戰前暫蹛臺北彼陣，有入選第八回臺展，後來成做臺陽美術協會的成員佮「行動洋畫集團（Hîng-tōng iûnn-uē tsi̍p-thuân）」（Mouve Artist’s Society）的發起人之一。戰後嘛真拍拚創作佮藝術推廣，1948年創辦「青雲美術會（Tshing-hûn bí-su̍t-huē）」，向望用美術作品來教育民眾，閣逐年舉辦「青雲美展」，𪜶畫會的成員時常做伙寫生踏草青，是呂基正性命中尾期創作大量山岳作品的原因之一。
〈高山秋色〉是1964年的油彩作品，若徛屏重重疊疊的山脈（suann-me̍h）佮掠橫（lia̍h-huâinn pâi-lia̍t）排列的樹仔（tshiū-á），構成畫面的前、中、後景，山脈佮樹仔構成坦徛（thán-khiā）的視角，是營造畫幅景深（kíng-tshim）主要的元素。一片交秋（kau-tshiu）涼凊（liâng-tshìn）的前景後壁，青蘢蘢的山脈一嶺過一嶺，釉白（iu-pe̍h）的雲霧罩山縫，正正佮遠景的寶藍色山脈相叫應，寒暖間插（hân luán kàn-tshap）的色調就是藝術家山岳作品的一大特色。山岳佇呂基正心目中，是充滿想像、會當四界遨（sì-kè-gô）的空間，一日對天光到暗的氣候變化，愈予伊感覺神祕、痴迷，𬦰山的每一跤步，攏予伊對性命佮人生智慧有無仝的體悟，親像伊捌講的：「人的心靈，綴山嶺的變化起起落落⋯⋯，予咱自身佮山岳交纏昇華，達成『山』、『人』合一的最高境界。」
賴欣宜，國立臺灣美術館典藏詮釋資料，2025。