台語譯文：
《戰地夢》系列攏總有四幅，是莊世和受高雄在地軍官委託，用「反攻大陸（huán-kong　Tāi-lio̍k」做背景，軍方等候準備作戰的情緒做主題來創作的。成果敢有合軍方的意咱毋知，毋過這系列煞是莊世和行向純然抽象表現（thiu-siōng　piáu-hiān）的重要作品，其中〈戰地夢(戰鬥)〉用若血水仝款的清紅色（tshing-âng-sik）做背景的基本調，畫面正中央經過真濟條直線，對無仝角度橫來直去成做一个像倒頭三角形的一區，閣共線條相交（suànn-tiâu sio-kau）圍出來的每一塊，用溶劑透薄、刀剾（to khau）、平塗（pênn/pînn-tôo）、筆路相疊等等各種技法透濫運用，直線的結構性構圖，閣有溶劑透薄（iông-tse　thàu　po̍h）造成的曖昧空間感，加上正中央的一擺閣一擺漆起去的筆法，予這幅畫作帶來一種足複雜的情緒表現。
出處：王雅玲，國立臺灣美術館典藏詮釋資料，2025。